Mae’r Ceidwadwyr Cymreig wedi dewis eu prif ymgeisydd ar gyfer rhanbarth Canolbarth a Gorllewin Cymru ar gyfer etholiadau’r Senedd yn mis Mai.
Yn Gymro Cymraeg, yn wreiddiol o Geredigion, mae Tomos Dafydd Davies yn gyn-fyfyriwr ym Mhrifysgol Aberystwyth, lle cwblhaodd ei astudiaethau ôl-raddedig. Yn gyn ymgynghorydd i dri Ysgrifennydd Gwladol Cymru, mae wedi sefyll ddwywaith fel ymgeisydd i Senedd San Steffan, yn fwyaf diweddar yn Dwyfor Meirionnydd yn Etholiad Cyffredinol 2019.
Wrth ymateb i’r cyhoeddiad, dywedodd Tomos:
O Aberystwyth i Aberhonddu, o Gaerfyrddin i Gaersws, does unman yn debyg i Ganolbarth a Gorllewin Cymru. Mae’r ranbarth wedi'i fendithio â busnesau ffyniannus, tirwedd godidog a chymunedau a chymeriadau unigryw a balch. Yn anffodus, yn aml iawn mae'r rhanbarth hwn wedi'i esgeuluso gan ein gwleidyddion yng Nghaerdydd.
Dwi’n edrych ymlaen adeiladu ar ein canlyniad etholiad cyffredinol rhagorol ledled y rhanbarth, ac ymgyrchu a thîm egniol o actifyddion i gyfleu neges gadarnhaol ar drothwy’r etholiad fis Mai, ac i roi Canolbarth a Gorllewin Cymru ar frig yr agenda wleidyddol.”
Ymhlith ei flaenoriaethau mae cefnogi ffermwyr Cymru, hyrwyddo allforion o Gymru a datgloi buddsoddiad yn yr economi leol trwy wella cysylltedd a mynediad at fand eang gwledig. Mae hefyd yn cefnogi galwadau i ddileu Cyfraddau Busnes ar gyfer busnesau bach, teuluol a busnesau lleol, sef asgwrn cefn yr economi wledig, fel rhan o gynllun adfer economaidd ôl-COVID.
Dywedodd Tomos:
Mae'r pandemig wedi tynnu sylw at y gorau o gymdeithas - o'r gweithredoedd dirifedi o wirfyddoli yn ein cymunedau lleol i wasanaeth cyhoeddus di-flino ein Gwasanaeth Iechyd Gwladol a gweithwyr allweddol. Ond mae digwyddiadau'r misoedd diwethaf hefyd wedi cadarnhau pa mor fregus mae economi Cymru.
Nawr, yn fwy nag erioed, mae angen ffocws wrth Lywodraeth Cymru ar dyfu’r economi a chefnogi busnesau. Mae Canolbarth a Gorllewin Cymru yn gartref i lawer o fusnesau bach, teuluol a lleol, a rhaid inni sicrhau ein bod yn creu hinsawdd lle gallant ffynnu, buddsoddi a llogi staff newydd, wrth inni ddod allan o'r pandemig truenus hwn yn 2021.”
Ar ôl cael ei gadarnhau fel ymgeisydd y Blaid Geidwadol, cyhoeddodd Tomos ei gynllun adferiad economaidd ôl-COVID ar gyfer Canolbarth a Gorllewin Cymru, sy'n galw ar Lywodraeth Cymru i:
- Diddymu cyfraddau busnes yn gyfan gwbl ar gyfer busnesau bach sydd â gwerth ardrethol o hyd at £15,000.
- Sefydlu Cronfa Adfer Cymunedol Coronafirws gwerth £250 miliwn i gefnogi cymunedau sydd wedi'u taro galetaf ledled Canolbarth a Gorllewin Cymru.
- Ymestyn ei pecyn cymorth ariannol ar gyfer y sectorau lletygarwch a thwristiaeth, sydd wedi cael eu taro'n arbennig o galed ar draws Canolbarth a Gorllewin Cymru, tan fis Mehefin 2021.
- Dyblu'r cyllid sydd ar gael i ail-hyfforddi ac uwchsgilio pobl ifanc sydd wedi colli swydd yn ystod y pandemig ledled Canolbarth a Gorllewin Cymru.
Yn dad i ddau o blant, mae addysg yn flaenoriaeth allweddol arall iddo. Dywedodd Tomos:
Rwyf am i bob rhiant gael y tawelwch meddwl sy'n dod o ddarparu addysg wych i'w plentyn a'r dechrau gorau posibl mewn bywyd. Yn anffodus, mae Llywodraeth Cymru yn parhau i danariannu ysgolion gwledig yn ddifrifol, tra bod cyrhaeddiad addysgol yn parhau i lusgo rhanbarthau eraill. Byddaf yn ymgyrchu i fynd i’r afael â’r gwahaniaeth rhwng cyllid y pen fesul disgybl ac yn ymladd am fargen deg i ysgolion gwledig ledled Canolbarth a Gorllewin Cymru.”
Mae Tomos yn gyn-ymddiriedolwr ar Lyfrgell Genedlaethol Cymru, Aberystwyth, yn gyn aelod lleyg o Gyngor Prifysgol Bangor ac yn ymddiriedolwr ar Ganolfan Cymry Llundain. Yn ei amser hamdden, mae'n mwynhau dilyn tîm rygbi Cymru, chwarae criced - yn ogystal â bod yn dad i ddwy o ferched.
DIWEDD
